तेलावरची पुरण पोळी

होळी रे होळी .... पुरणाची पोळी

होळीनिमित्तची आजची खास पोस्ट .... तेलावरची पुरण पोळी
माझी आई नेहमी म्हणते , ज्या  बाईला तेलावरची पुरणपोळी करता आली ती खरी सुगरण . पिठावरची काय कोणालाही लाटता येते . आणि हो ... हे १००% खरं आहे . कारण तेलावरची पोळी लाटताना हात एकतर खूप नाजूक हलवावा लागतो आणि दुसरं म्हणजे जराशी घाई केली कि पोळी फुटलीच म्हणून समजा .

थोडी मोठी वाटेल वाचताना पण जमतील तितके सगळे बारकावे लिहिले आहेत . करताना सगळ्या गोष्टी काळजीपूर्वक अमलात आणा .

१०  आकाराच्या  मध्यम पोळ्या
वेळ: २0 मिनिटे (पुरण आणि पीठ तयार असल्यास)


साहित्य 
१ वाटी हरभरा डाळ (चणा डाळ )
१ वाटी गूळ किसून किंवा बारीक चिरून 
२ वाट्या गव्हाचे पीठ 
तेल 
मीठ
पाणी 
वेलदोडे 
बडीशेप 


पुरणाची कृती 

१. हरभरा डाळ स्वच्छ धुवून एका मोठ्या भांड्यात दुपट्ट पाणी घालून शिजत ठेवावी 
२. अर्ध्या तासात डाळ पूर्ण शिजते . बोटांवर डाळ दाबून पाहावी . 
३. शिजलेल्या डाळीचे पाणी दुसऱ्या भांड्यात ओतून घ्यावे . 
४. पाणी बाजूला केलेल्या शिजलेल्या कोरड्या डाळीत किसलेला गूळ , बडीशेप आणि वेलदोडे पूड एकत्र करावी 
५ . हे मिश्रण १० मिनिट एकजीव होई तोवर शिजवावे. 
६. त्याचा भांड्यात घट्टसर गोळा तयार होईल . 
७. मिश्रण थंड आल्यावर पुरण यंत्रातून / मिक्सरमधून पुरण वाटून घ्यावे . 


टीप : पुराणात गूळ  जास्त झाला तर पोळ्या कडक होतात .   

कणकेची कृती 

१. २ वाट्या गव्हाचे पीठ , ३ चीनचे तेल , मीठ घालून कणिक मळून घ्यावी . 
२. या पोळीसाठी कणिक अगदी सैलसर आणि मऊ मळावी . 
३. यासाठी हात ओला करून करून कणिक मुठीने तींबावी. 
४, झाकण ठेवून १ तास भिजण्यास ठेवावी . 

पोळीची कृती ;

पोळी लाटायला सुरु करण्या आधी चालू गॅसवर तवा  पालथा घालून गरम होऊ द्यावा . 
१. कणकेचा मध्यम आकाराचा गोळा घेऊन पोळपाटावर २ चमचे तेल घालून एकदा उभा आणि एकदा आडवा लाटून लहान पुरीचा आकार करावा . .
२. पुरणाचा  कणकेपेक्षा साधारण मोठा गोळा घेऊन लाटलेल्या कणकेमध्ये घालून गोळा बंद करून घ्यावा . 
३. पळपाटावर पुन्हा १ चमचा तेल घालून पोळी लाटून घ्यावी 
४ . पोळी लाटताना अजिबात उचलू नये . गरज पडल्यास पोळपाट फिरवावा. लाटणे एकाच दिशेने  ( खाली किंवा वर ) फिरवावे. अन्यथा पोळी फुटते . 
५. लाटलेली पोळी लाटण्याला गुंडाळून अलगद उचलावी 
६. पालथ्या गरम तव्यावर पोळी लाटण्यानेच टाकावी 
७ . दोन्ही बाजूस खरपूस भाजून घ्यावी 
८ . तूप घालून गरम गरम वाढावी . थंड पोळ्या दूधाबरोबर/ गुळवणी सोबत छान लागतात.

गुलवणी कृती 
१. एका पातेल्यात १ पेला पाणी गरम करण्यास ठेवा . 
२. त्यात २ मोठे गुळाचे खडे टाका 
३. एक उकळी येऊन गुल विरघळेल . मिश्रण थंड होऊ द्या . 

४. हि गुळवणी थोडंसं  दूध मिक्स करून पोळी सोबत खायला द्यावी 

~ अमृता ..